Fii no Iisaa Almasiihu on janniri fii no torortee
Wano mawɗo anndiri non ko nafata paykun makko kun e dokke ɗe kun mari ɗen nde o yi’i weltaare wonde nden ka yeeso makkun nde kun hendii dokkal timmungal, ko wano non ɓernde Alla nden wonirani en. On haanaa funsitude ngurndan mon ɗan fii piiji ɗi hittaa. Ɗoo e ɗun, hiɗen waawi wuurude e nder heɓugol gandal weeɓungal wonandema Alla dankoto en e himo faalaa barkingol fayɓe makko ɓen. Toraare ko feere nde yeɗaɗen fii no ariren ka Alla e fii weeɓitangol mo wondema hiɗen hoolii mo fii ko fewti kon sokolaaji men ɗin e faaleeji men ɗin. Ko toragol mo tun woni ko landaɗen.
Daaluyee Allahu on daalii :
Kala dokkal moƴƴal e kala dokkal timmungal ko ka dow iwrani en, e immorde e Baabaajo ndayguuji ɗin, on mo waylotaako, mo ɗowdi mun dillataa.
YAAQUUBA 1:17
Fii no Taalibaaɓe ɓen Haani Tororde Alla
Ɲande goo tawi Iisaa no toraade Alla nokku goo. Ɓay o gaynii toraade, goɗɗo e taalibaaɓe makko ɓen wi’i mo: «Koohoojo, tindinee men no torortee wano Yaayaa tindinirnoo non taalibaaɓe mun ɓen.»
Onsay o wi’i ɓe: «Nde hiɗon toroo, on wi’iray nii:
«Baaba,
yo innde maa nden hormore,
yo laamu maa ngun feeɲu.
Okkor men ɲande woo ɲaametee haananɗo men on.
Yaafanoɗaa men junuubaaji amen ɗin,
wano menen kadi men woni yaaforande kala bonnuɗo men.
Wota a naadu men e jarrabuyee.»
O wi’i kadi: «Si goɗɗo e mon aru e immaade tumbere jemma, yaha ka njaatigi mun, o findina mo, o wi’a mo: ‹Njaatigi, ɲawlan bireediije tati, ko fii miɗo heɓi koɗo ka jemma ɗoo, mi alaa hay fus ko mi okkora mo.›
«Si on non mo o findinoyi wi’ii mo: ‹Mi torike ma wota a finnan, ko fii a taw mi falii baafal ngal, min e fayɓe an ɓen men waalike. Mi waawataa immaade fewndo ɗoo, mi jonne bireedi!› Mi andinii on, hay si o immaaki, o jonnira mo sabu njaatigiyaagal wongal hakkunde maɓɓe ngal, o jonniray mo kala ko o handi sabu ko on torotooɗo haɓɓitori angal hersa kon.
«Min-le mi wi’ii on: Toree, on okkorte. Ɗaɓɓee, on heɓay. Hoɗɗee, on udditante. Ko fii kala toriiɗo okkorte, kala ɗaɓɓuɗo heɓay, awa kadi kala on hoɗɗiiɗo udditante.
«Ko hombo e mon, ɓiɗɗo mun torotoo ɗun bireedi, ontigi jonna mo hayre? Maa o toroo mo lingii, ontigi jonna mo mboddi? Maa o toroo mo woofoonde, o jonna mo yaare? Si tawii non hay onon bonɓe ɓen, hiɗon waawi waɗande ɓiɓɓe mon ɓen piiji moƴƴi, haray ko haa honto Ben mon Wonɗo ka kammu on okkorta ɓen toriiɓe mo Ruuhu Seniiɗo on!»
Linjiila Iisaa Almasiihu On ka Luuka 11:1-13
