Yamirooje Alla ɗen Sappo
Ka peewal makko e gandal makko, Allaahu on daalanii en yamirooje makko ɗen. Yeeso ɗee yamirooje Joomiraaɗo on, hara ko a feewuɗo kaa ko a junuubankeejo ?
Taw si a ndaarii ɓeyngu maa moodi ɲokondo maa, hara a faalaa wondude e makko ? Ko a jeenoowo ka ɓernde maa.
Taw si a wujjii goɗɗun ? Ko a ngujjo.
Taw si a fenii ? Ka a fenoowo.
Taw si a himmanii ko ɲokonodo maa on jeyi ? Ko a ngujjo ka ɓernde maa.
Ka Daaluyee Alla, no windi wonde on mo doftaaki yamiroore wootere ka Sariya Alla, ko o felniiɗo yeeso Sariya on fow. Ɗun no firi, ko o junuubankeejo.
An kadi, hara a doftaaki Sariya Alla hay ndee wootere ? Ko a felniiɗo yeeso Alla.
No windi kadi ka Daaluyee Alla, «Ko fii, njoddi junuubu ko mayde.»
Ko honno wonirtaa feewuɗo yeeso Alla ?
Ɗibbee ley ɗoo fii yewtidugol e goɗɗo mo wallita e faamu eɓɓoore Alla nden.
Hara hiɗon faalaa yewtitude e goɗɗo fii eɓɓoore Alla nden ?
Yewtirdee e men ka Messenger
Hara hiɗon faalaa jangude ɓuri nii taariikaaji suutaaɗi ɗin ka nder Kitaabul-Muggadasi e hiɗon faalaa hendaade nde ?
Daaluyee Allahu on daalii :
Yamirooje Alla ɗen Sappo
Onsay Allaahu on daali ɗii daaluyeeji ɗoo, o wi’i:
«Ko min woni Alla Joomiraaɗo maa on, on yaltinɗo ma leydi Misira e nder ndii leydi njaggu.
«Wota a heɓu alla goo si wonaa min.
«Wota a moƴƴinan hoore maa sanamu maa ko nanditi e goɗɗun ko woni ka kammuuli dow maa ko woni ka hoore leydi maa ko woni ka nder ndiyan wonɗan ka nder leydi. Wota a sujjan ɗi maa rewaa ɗi, ko fii min Alla Joomiraaɗo maa on ko mi Allaajo nawluɗo, yagginoowo ɓiɓɓe aɲuɓe lan sabu junuubaaji baabiraaɓe mun haa e jamaanu tataɓu e jamaanu nayaɓu, kono holloowo ɓen yiɗuɓe lan, jaɓi yamirooje an ɗen, giggol sella-findewol haa e jamaanuuji guluuje.
«Wota a jogor innde Alla Joomiraaɗo maa on meere, ko fii Joomiraaɗo on ronkataa donkinde on jogorɗo innde makko nden meere.
«Maanditoɗaa kadi ɲalaande fowteteende nden, horminaa nde. A gollay golleeji maa ɗin fow e nder balɗe jeegoo, kono ɲalaande jeeɗiɗaɓere nden ko ɲalaande fowteteende Alla Joomiraaɗo maa on. Wota a gollu golle woo nden ɲande, woni an, woni ɓiɗɗo maa, woni jiwo maa, woni maccuɗo maa, woni korɗo maa, woni daabeeji maa ɗin, woni koɗo wonɗo ka maa. o fii ko e nder balɗe jeegoo Joomiraaɗo on tagi kammu ngun e leydi ndin e baharu on e kala ko woni e mun. O fowtii ka ɲalaande jeeɗiɗaɓere. Ko ɗun waɗi si Joomiraaɗo on waɗi barki e ɲalaande fowteteende nden, o waɗi nde hormorteende.
«Teddinaa yumma maa e ben maa fii yo balɗe maa ɗen juutu ka hoore leydi ndi Alla Joomiraaɗo maa on okku-maa.
«Wota a ittu hoore.
«Wota a jeenu.
«Wota a wujju.
«Wota a seedito fenaande e hoore ɲokondo maa.
«Wota a himman suudu ɲokondo maa, maa himmanaa debbo ɲokondo maa, maa himmanaa maccuɗo makko maa korɗo makko, maa himmanaa nagge makko, maa mbabba makko, maa hay huunde e ko ɲokondo maa jeyi.»
Tawi jamaa on fow no nanude hito parɲitte ɗen e hito alaadu ngaari baali ngin, hiɓe yi’ude maƴanɗe ɗen e fello wongo suurude ngon. Ɓay jamaa on yi’ii ɗun ɓe woni e diwnugol, ɓe daroyii ka woɗɗitii, ɓe ewnii Muusaa, ɓe wi’i mo: «An tigi yewtu men, men jaɓante, kono wota Allaahu on tigi daalan men, kulol wota men maayu.» Muusaa kadi jaabii ɓe, wi’i: «Wota on hulu! Ko addi mo kanko Alla ko fii ndarndagol on, e fii yo on hulu mo, hara on waɗaali junuubu.» Tawi jamaa on no darii ka woɗɗitii, kono Muusaa kaɲun ɓadii duulere niɓɓitunde ka Alla wonnoo ɗon.
Tawreeta Annabi Muusaa
Fii Doftaare e Yamirooje ɗen
Ko ɗun waɗi, on mo yeddi yamiroore wootere e nder Sariya on, hay si o ɗoftike ɗeya heddiiɗe fow, haray o wonii bonnuɗo Sariya on fow.
Ɓatakuru Sahaabaajo Yaquuba ndun
Fii Immoode Yamirooje ɗen
Hiɗen andi wonde ko Sariya on wi’i kon fow ko wonɓe e ley Sariya on wi’aa, fii no kala hunduko ombiree, e no Alla ɲaawira yimɓe aduna on fow. Ko fii hay gooto jogortaake feewuɗo yeeso Alla fii ko o ɗoftii Sariya on kon, ko fii ko immorde e Sariya on junuubu andori.
Ɓatakuru Sahaabaajo Puulusa ndun haa e ɓe Roomu ɓen