Fii Galo Faaɗa-Hakkiljo
Luuqa 12:13-21
Fii Galo Faaɗa-Hakkiljo
13 Goɗɗo e hakkunde on jamaa wi’i Iisaa: «Karamoko’en, maakanee ben-gooto an on yo men sendodu ndondi amen ndin.» 14 O jaabii on neɗɗo, o wi’i: «Ko hombo waɗimmi ɲaawoowo maa sendanoowo on?» 15 O watti e ɗun: «Reenee wattanon yiila e kala miile, ko fii ko aaden alɗi woo, ngurndan makko ɗan hinaa e ɗun humii.» 16 Onsay o waɗani ɓe ngal misal ɗoo, o wi’i: «No woodunoo neɗɗo alɗuɗo mo toore leydi mun moƴƴiri ɗun fota. 17 Tawi on neɗɗo no miijotonoo, wi’a: ‹Ko honno mi waɗata, ko fii mi alaa ka mi waɗa ngal coɲal an?› 18 O wi’itii: ‹E hino ko mi waɗata kon: Mi lancay tumusuuje an ɗen, mi moƴƴina ɓurɗe ɗe njanɗude ka mi loowa nenɗe an ɗen e piiji an ɗin fow. 19 Jooni yo wonkii an, ɓay miɗo mari jawle buy ko yonatammi e nder duuɓi buy, yo mi fowto, mi ɲaama, mi yara, mi weltoo!› 20 «Kono Allaahu on wi’i mo: ‹Ko an yo faaɗa-hakkiljo, e nder oo jemma ɗoo tigi a ƴantete wonkii maa kin. E hara koo ko faandiɗaa, ko hombo ɗun wontanta?› 21 «Awa ko nii woniranta kala on mooɓuɗo jawle e ɓaawo alɗangol Alla.»
Ko honɗun ɓuri hittande on e nder ngurndan maa ɗan? E hara ko conci fotuɗi, golle wonduɗe e barki, maa ɗun ko yo on heɓu kaalisi ɗuuduɗi haray on haanaa gollude hande kadi? Ɗee ayeeje ɗoo no holli en ko yo en wattan yila e fee alɗere nden, wata ɗun wonan en sanamuuru, haray on sanumuuru wonan en alla amen, lonto Alla Bajjo on. Nde en maayi woo, ko pellet Joomiraaɗo on anday ko hittani men, si tawii haray ko kurkanagol mo, kanko Joomiraaɗo, maa ɗun si ko kurkanagol kaalisi. Himo andi ɓerɗe amen ɗen e daliiluuji amen ɗin ɓuri ko men andi kon. Awa, mi landitoto on, ko honɗun ɓuri hittande on fewndo ɗoo nii?