Iisaa Almasiihu on okkay tama'u
Iisaa Almasiihu on maaki wondema ko en barkinaaɓe nde wonɗen miskimɓe e nde weelaɗen e nde wulleten e nde tampinaɗen. Hara nden yewtere no rewri ? En weltotaako fota nde suga ɗin piiji hewti en. E ko honno non ɗun gasirta ? Jannde Iisaa Almasiihu nden okkoray en tama’u e fee andintingol en wondema sattendeeji oo saa’i fewndiiɗo ko feƴƴayɗi e ɗi foddaa eɓɓindireede e weltaare aroyaynde nden si en anniyike jokkugol mo kanko annabi Iisaa. Ɗoo yo en jokku miijooji aaden foolaaɗo, en heɓay tama’u si en fewtii no tiiɗiri e fodaariiji aroyooji ɗi o fodi en ɗin. Wonande ɓen fewndinɓe annde tiiɗunde, Alla yeɗay on weltaare. E si goɗɗo no cukkeede tampinee sabu ko o jokki kon annabi Iisaa, haray o weddaaki, njoddi mawndi no habbii mo. Ɗoo yo en heɓude muuseendi e tippirooji e nder oo aduna, haray tama’u no woodani en ɓayru Iisaa Almasiihu on foolii aduna on.
Daaluyee Allahu on daalii :
Fii Waaju ngun ka hoore Fello
Ɓay Iisaa yi’ii jamaa on, o ƴawi ka fello, o jooɗii, taalibaaɓe makko ɓen kadi ɓadii mo. Onsay o woni e jannugol jamaa on, wi’a:
Laaɓa-ɓerndeeɓe ɓen ko malaaɓe, ɓay ɓe yi’oyay Alla.
Ɓuttinooɓe ɓen ko malaaɓe, ɓay ɓe noddiroyte ɓiɓɓe Alla.
Cukketeeɓe sabu peewal ngal ko malaaɓe, ɓay laamu kammu ngun ko kamɓe wonani.
«On wonay malaaɓe nde ɓe yenni on e nde ɓe cukkii on e nde ɓe fawi penaale e kala bone e hoore mon sabu an. Weltee, wonon e nder welo-welo, ɓay hiɗon maranaa njoddi mawndi ka kammu, ko fii ko nii ɓe cukkornoo annabaaɓe adinooɓe on ɓen.
Linjiila Iisaa Almasiihu On ka Matta 5:1-12