Yamirooje Ɓurɗe Mawnude ɗen
Yamirooje no ɗuuɗi ka Daaluyee Alla. Hiɗen faalaa ɗoftaade yamirooje Alla, weltina mo. Kono ka yamirooje makko, ko honɗun e maɓɓe no ɓuri fow hittude ? Iisaa Almasiihu on hollii en ɗii yamirooje ɗiɗi: yiɗu Alla e yiɗu ɲokondo maa.
Yiɗu Alla
Almasiihu on wi’i: «Yo a yiɗir Alla Joomiraaɗo maa on ɓernde maa nden fow e wonkii maa kin fow e hakkil maa kin fow. Ko ɗun woni yamiroore aranere nden e mawnde nden.»
Ɗoftagol Alla wonaa kuuɗe tun; ko ka ɓernde ɗoftaare iwata. Hay si a waɗi kuuɗe moƴƴi buy, si a yiɗaa Alla ka ɓernde e ka wonkii e ka hakkil, a ɗoftaaki Alla. Fuɗoode ɗoftaare no ka giggol maa telen Alla.
No windii: Hay si mi wowlii e haalaaji yimɓe ɓen e ɗi malaa’ikaaɓe ɓen, si tawii mi alaa giggol, haray ko mi talenhun sila senƴoohun, maa foolifen wonɗo e iidude. Hay si mi yeɗaama dokkal haalugol ko Alla longinimmi kon e faamu fii gundooji ɗin fow e gande ɗen fow, e hay si mi heɓii gomɗinal haa ka tawata mi dillinay pelle ɗen, si tawii mi alaa giggol, haray hinaa mi fus. Hay si mi okkitirii keyeeji an ɗin fow fii ɲammingol miskinɓe ɓen, e hay si mi okkitirii ɓandu an ndun fii yo ndu sunne, si mi alaa giggol, ɗun nafataa lan huunde.
Giggol ko muɲal, giggol ko moƴƴuki, giggol nawlataa, giggol mantotaako, hinaa heewungol mawnintinaare. Ngol waasaa needi, ngol ɗaɓɓataa nafa maggol, ngol yaawataa seytinde, ngol marataa bone. Ngol weltortaa angal peewal, kono ko goonga ngol weltorta. Giggol heɲɲay ko woni woo, hingol hoolii ko woni woo, hingol tanƴinii e ko woni woo, hingol wakkilii ko woni woo. Giggol ngol lannataa haa poomaa.
Yiɗu ɲokondo
Almasiihu on wi’ii: «Yo a yiɗir ɲokondo maa on wano yiɗirɗaa hoore maa non.»
Nokkun goo, o wi’ii: « Waɗanee yimɓe ɓen wano faaliraɗon yo ɓe waɗan on non. Ko fii ko ɗun Sariya on e annabaaɓe ɓen wi’i.»
No windii kadi: On mo wi’i no yiɗi Alla, e hoore himo aɲi musiɗɗo makko, haray ko fenoowo. Ko fii on mo yiɗaali musiɗɗo mun mo o renti on, haray o waawataa yiɗude Alla mo o rentaa on. Awa, ko ndee yamiroore ɗoo heɓirɗen mo: mo no yiɗi Alla, yo yiɗu kadi musiɗɗo mun on.
Si tawii a ɗoftike ɗee yamirooje ɗiɗi, taway a ɗoftike yamirooje fow, saɓu yamirooje fow no tawaa ka nder ɗee ɗiɗi.
Hara hiɗon faalaa yo goɗɗo torodu e maa ?
Yewtirdee e men ka Messenger
Hara hiɗon faalaa jangude ɓuri nii taariikaaji suutaaɗi ɗin ka nder Kitaabul-Muggadasi e hiɗon faalaa hendaade nde ?
Daaluyee Allahu on daalii :
Fii Yamirooje Ɓurɗe Mawnude ɗen
Ɓay Fariisiyaaɓe ɓen humpitike wonde o fankinii Sadduusiyaaɓe ɓen, ɓe mottondiri. Goɗɗo e maɓɓe, waawuɗo fii Sariya on, landii mo ɗunɗoo fii ndarndagol mo, o wi’i: «Karamoko’en, ko yamiroore honde ɓuri mawnude ka Sariya?»
Iisaa jaabii mo, wi’i: «Yo a yiɗir Alla Joomiraaɗo maa on ɓernde maa nden fow e wonkii maa kin fow e hakkil maa kin fow. Ko ɗun woni yamiroore aranere nden e mawnde nden. E hino ɗimmere nden ko wa mayre: Yo a yiɗir ɲokondo maa on wano yiɗirɗaa hoore maa non. Ko e ɗee yamirooje ɗoo ɗiɗi Sariya on fow e annabaaɓe ɓen tippi.»
Linjiila Iisaa Almasiihu on ka Matta 22:34-40
Onsay goɗɗo e waawuɓe fii Sariya ɓen immii landii mo fii ndarndagol mo, o wi’i mo: «Karamoko’en, ko honɗun mi haani waɗude fii yo mi heɓu ɗan ngurndan poomayankejan?»
Onsay Iisaa wi’i mo: «Ko honɗun windii ka defte Sariya? Ko honno faamirɗaa ɗun?»
O jaabii mo, o wi’i: «Yo a yiɗir Alla Joomiraaɗo maa on ɓernde maa nden fow e wonkii maa kin fow e doole maa ɗen fow e hakkil maa kin fow, yiɗiraa ɲokondo maa on wano yiɗirɗaa hoore maa non.»
Onsay Iisaa wi’i mo: «A jaaborii no moƴƴiri. Warru non, a heɓay ɗan ngurndan.»
Kono tawi on no faalaa hollude peewal mun ngal, o wi’i Iisaa: «Ko hombo non woni on ɲokondo an?»
Iisaa jaabori mo nii, o wi’i: «Goɗɗo no iwraynoo Yerusalaam, no yaha Yeerikoo. O hawrondiri e wuyɓe, ɓen ɓoori mo, piyi mo haa moggo mayde, ɓe yahi, ɓe acci mo ɗon. Hawrondiri yottinoowo sadaka no feƴƴaynoo ɗon, o yi’i oo neɗɗo, o takkii mo, o feƴƴi. Fahin Lewiyankeejo ari tawi mo ɗon, on kadi yi’i mo, takkii mo, feƴƴi. Kono Samariyankeejo wonɗo e nder safaari mun, ari tawi mo, yurmaa mo. Onsay o ɓadii, o juurani mo njaram e nebban ka barmeeji, o haɓɓi. Onsay o waɗi mo ka mbaɗɗateeri makko, o naɓi mo haa e suudu hoɓɓe, o dankii mo. Bimbi mun, o ƴetti dinaruuji ɗiɗi, o jonni jom suudu hoɓɓe ndun, o wi’i mo: ‹Dankor mo ɗii ɗoo. Kala ko fawoyɗaa e hoore ɗii ɗoo, mi yoɓitoyte tuma mi rewtoyi.› »
Ontuma Iisaa wi’i: «Ko hombo e ɓee ɗoo tato woni ɲokondo oo mo ɓee wuyɓe yani e mun?»
On waawuɗo fii Sariya jaabii, wi’i: «Ko yurmaaɗo mo on.»
Onsay Iisaa wi’i mo: «Yahu an kadi warraa non.»
Linjiila Iisaa Almasiihu on ka Luuka 10:25-37